 |
 |
 |
 |
S'Assòtziu "Sa Bèrtula Antiga" nascit in su 2005. Incarrerat a traballai po sa lìngua sarda in su 2006, impari a s'Assòtziu "I Talenti - Onlus", cun is primus fainas de sa Lei Natzionali Nu. 482 de su 1999, po s'amparu e s'avaloramentu de is lìnguas de minoria. Sa tenta est de nci pesai su sardu cun sa matessi dinnidadi de s' italianu, ca, ddu scieus, in Itàlia sa lìngua sarda est sa prus fueddada apustis de s'italianu etotu. Innantis de "Sa Bèrtula Antiga" ddoi fiat un'àtera sotziedadi chi ddi nant "Europroject", e is chi ndi fadiant parti iant traballau giai po unus cantu de annus cun àteras Leis apitzus de sa lìngua sarda, est a nai cun sa Lei 26, cun progetus fatus cun unus cantu de Gal sardus, cun is Comunus e cun is Provìntzias. Eus incarrerau cun duus o tres Comunus e in ses annus seus lòmpius a ndi sighiri giai otanta. No ddu naraus po si bantai, ma po fai cumprendi ca su traballu est meda e, tambeni, su tretu chi teneus ananti est longu. Po custu seus circhendi de fai su mellus, e a pagu a pagu seus agatendi sa bia po chi su sardu potzat torrai a essi sa lìngua de totus. Teneus un' Arretza Internet chi si permitit de traballai beni e de fai connosci is fainas cosa nosta. Donniunu sighit su setori suu. Ddoi funt is chi càstiant sa parti aministrativa, su tènnicu informàticu, su coordinadori e unus binti operadoris chi traballant me in is Ufìtzius de sa Lìngua, in is Comunus, in mesu a sa genti. Sa scuadra est giòvuna ma giai esperta in su stùdiu de is chistionis de sa lìngua. A su mancu una borta a su mesi nos' atobiaus in sa seu de Biddaremosa po arraxonai apitzus de is fainas fatas e de fai, agiudendi-sì a pari po si-ndi scabulli de is problemas chi pertocant s'avaloramentu e s'amparu de sa lìngua. In s' interis, is operadoris circant de fai in manera chi sa lìngua siat una lìngua bia me in is Ufìtzius, me is Comunus, in is Scolas, me is Bibliotecas e me in is Assòtzius de cultura chi s'agatant in dònnia bidda. Is formadoris, chi ant studiau po cussu, circant de no fai is maistus sceti, ma de donai a sa genti sa possibilidadi de arraxonai apitzus de sa lìngua e de su tretu stòricu chi at fatu, de s'ortografia e de sa gramàtica, de sa literadura e de su connotu linguìsticu. Duncas circaus de aberri e de fai connosci unu mundu chi nosu sardus sèmpiri eus tentu ananti a is ogus ma forsis no fiaus meris de is ainas po ddu castiai mellus. A àterus annus, po chi sa lìngua sarda potzat bivi cun nosu e pruschetotu, e po tempus meda, apustis de nosu. |
 |
 |
 |
 |